كل دي عناوين مُتاحة ممكن تقرأها هنا وهناك
وزي ما في منهم مجرد عناوين، أكيد في كمان منهم دورات ممكن تبقى مفيدة ... أو مفيدة جداً.
لكن خلينا نتفق على حاجة،
علشان إللي أوله شرط ... أخره "حلم منوّر".
وده الوعد مش بس الشرط:
ما فيش حد يقدر يخليك في سبعة أيام تبقى الفنان إللي بتحلم بيه؛ مع كل الإيمان بكل المعجزات الممكنة!
لكن لو ده حصل، يبقى بالتأكيد الشخص ده كان مبتدي طريق حلمه من سنين؛ وسنين طويلة قبل السبعة أيام دول؛ ويمكن من قبل ما هو نفسه يبقى واخد باله. يعني كان شغال على نفسه بتدريبات عملية يومية، وقراءة، ومشاهدة، ومتابعة للثروة الفنية.

وبكده يكون الشرط علشان توصل لحلمك؛ مش بس علشان يتم اختيارك إنك تحضر معانا الدورة التدريبية:
إنك تكون شغال على نفسك وعلى موهبتك بكل الطرق المتاحة عندك، وتكمل تشتغل عليهم طول الوقت.

وبكده برضه يكون الوعد:
إنك لو إنت الإنسان الموهوب والمجتهد ده، هاتكون الدورة التدريبية دي فرصة كبيرة لك؛ بتنقلك نقلة قوية لقدام وبتشاور لك على بداية سكك؛ لو عافرت فيها، هاتوصل لحلمك.

برنامج حلم النور التدريبي مقسم إلي ثلاثة مراحل:

• معسكر،
• ورش عمل،
• مشاريع التخرج وحفلة تقديم المشاريع.

وهايبقى معنا مجموعة من المدربين المتخصصين في ١٥ موهبة مختلفة. وهم إللي هايقوموا بدور التدريب في المعسكر، والإشراف على ورش التدريب العملية اللي هاتتدربوا فيها عملي حقيقي باحترافية سوق العمل وأدواته؛ وكمان هاتبدأوا تجهزوا فيها لمشاريع التخرج. ومشاريع التخرج هاتتقدم في حفلة ضخمة هاتكون متغطية تغطية إعلامية كويسة، ودي هاتبقى فرصتكم للإنطلاق.

لو هو ده اللي بتحلم بيه من زمان، يبقى ده الوقت إنك تبدأ خطوات التقديم في الدورة التدريبة.

والمعسكر هايكون في المدينة الشبابية بأبي قير برعاية وزارة الشباب في الفترة من ١ إلى ٧ أكتوبر ٢٠١٥. ولو أتممت مرحلة المعسكر بنجاح، هايتم ترشيحك للمرحلة التانية لتكملة البرنامج التدريبي من خلال حضور ورش التدريب والشغل لتجهيز مشاريع التخرج. وتفاصيل الورش هايتم الإعلان عنها لاحقاً. وباللتالي، تكلفة البرنامج التدريبي ها تدفعها على جزئين:

• ٧٥٠ جنيه رسم حضور المعسكر؛ وده لازم تدفعه قبل المعسكر.

• ٧٥٠ جنيه رسم حضور ورش التدريب، شاملة تكاليف حفل الختام. وده ها تدفعه لما تتم المعسكر بنجاح، وتترشح للمرحلة التانية إللي هي ورش التدريب.

إبدأ جمعهم من أول النهارده.

إختار الموهبة إللي عايز تكمل فيها طريقك، إقرأ الصفحة بتاعتها كويس بتركيز؛ وإبدأ إملأ الإستمارة. وباب التقديم هايفضل مفتوح لحد يوم الثلاثاء الموافق ٢٥/ ٨/ ٢٠١٥ . وتقدر تدخل في أي وقت تضيف وتعدل على بياناتك والطلبات المطلوبة منك في التقديم.

بعد غلق باب التقديم، هايتم حصر المتقدمين واستبعاد إللي لا تنطبق عليه شروط التقدم. وبعدها هايتم إبلاغ الباقيين بميعاد المقابلات إللي بناء عليها، هايتم اختيار المشتركين.

ملحوظة: مش مسموح إنك تقدم في أكتر من موهبة.

ملحوظة كمان: الفئة العمرية المستهدفة من ١٨ إلى ٢٥ سنة. وبالتالي هايكون ليهم الأولوية.